Sant Ujöp Freinademetz é nasciü sö Oies a San Linert ai 15 d’aurì 1852. Al ê le cuarto de trëdesc mituns de na familia da paur dër religiosa. Na fede via y n amur sinzier al proscim, ch’al â imparè a ciasa, é la fondamënta por süa vocaziun. Ti agn ch’al studiâ a Porsenù él gnü brancé dala parora dla Scritöra ch’al â aldì te na pordica: „Al é i mituns che scraia do pan, mo al n’é degügn che ti al rump“ (Lamentaziuns 4,4); al aldî chëstes parores sciöche n scrai di mituns pagans do la verité y la grazia dla fede cristiana; chësta esperiënza é deventada por Ujöp la somënza che é sfiorada sö, tolon a cör la vocaziun de jì tles misciuns.

Ai 25 de messè 1875 él gnü consacrè prou y é rové caplan a San Martin. Ai 11 d’agost 1878 àl tignì dailò süa pordica de comié y é jü tla ćiasa miscionara de Steyl, pormò fondada trëi agn denant, y é deventè un di dui pröms anunziadus dl vagnele dla congregaziun miscionara.

Da d’aisciöda dl 1879 él pié ia tla Cina. Al ti à dit aroveder por amur a Chël Bel Dî y ai fredesc, lascian indô süa familia, a chëra ch’al ê dër tachè, y süa patria tan amada, por ne les odëi mai plü.

Trënt’agn él stè miscionar, impröma tla Diozeja de Hongkong y spo tl Shantung meridional. Zënza se stanćé y cun na buntè che davagnâ i cörs dla jënt, àl operè sciöche pionier y miscionar jon da n post al ater; al ti stô do cun lezitënza ai cristians pormò convertis, ćiarâ de arjigné de bugn catechisć y se cruziâ por la formaziun de proi dl post. Deplü iadi àl albü da portè la responsabilité por döt le raiun dla misciun; dal 1900 inant êl superiur dla congregaziun di miscionars de Steyl tla Cina.

Do che süa vita é stada n pêr de iadi al prigo, él mort dal marac ai 28 de jenà l’ann 1908. Freinademetz, che ê respetè y bëgnorü dai confredesc y dai cristians, gnô defata conscidré sciöche n sant. Tres deplü credënć, dantadöt tla Cina, te Südtirol y tl’Austria, à metü man da l’invochè do süa interzesciun.

L’ann 1936 à scomencè le prozès informatif y dl 1951 le prozès apostolich por la beatificaziun.

La domënia dles misciuns dl ann sant 1975, é Ujöp Freinademetz gnü detlarè beât adöm cun Arnold Janssen, le fundadù di Miscionars Verbic, y ai 5 de otober 2003 él gnü detlarè sant.

La ćiasa olach’al é nasciü é deventada le travert de tröc peregrins da indlunch adalerch.